(धाराशिव गुन्हे शाखेच्या टीमने, दोन दिवसात जळकोट येथील वृद्ध महिलेच्या खुनाचा लावला तपास)
धाराशिव न्यूज रिपोर्टर विजय पिसे जळकोट
तुळजापूर तालुक्यातील जळकोट येथे दि २१.११.२०२५ रोजी पोस्टे नळदुर्ग हददीत जळकोट येथे महिला नामे सुभद्रा रामशेटटी पाटील, वय ६० वर्षे, रा जळकोट या वृदध महिलेचा तिच्या राहत्या घरी कोणीतरी अज्ञात व्यक्तीने खुन करून अंगावरील सोन्याचे दागिने चोरून नेल्याची घटना घडली होती. सदरबाबत पोस्टे. नळदुर्ग गुरनं. ४३०/२०२५ कलम १०३(१), ३११ (८), ३०५ भा.न्या.सं. अन्वये खुनाचा गुन्हा नोंद करण्यात आला होता.
प्रथमदर्शनी सदर गुन्हा कोणी केला याबाबत पुरावे उपलब्ध नसल्याने सदरील गुन्हा उघडकीस आणणे पोलीसांसमोरील मुख्य आव्हान होते. गुन्हयाचे गांभीर्य लक्षात घेवून पोलीस अधिक्षक श्रीमती रितू खोखर यांनी तातडीने स्थानिक गुन्हे शाखा धाराशिव यांना तात्काळ सदर गुन्हा उघडकीस आणणेबाबत आदेशीत केले होते. त्या अनुशंगाने स्थानिक गुन्हे शाखेचे पोनि विनोद इज्जपवार, सपोनि सुदर्शन कासार व पथक यांनी तात्काळ सदर गुन्हयाचे घटनास्थळी भेट देवून गुन्हा उघडकीस आणण्याच्या दुष्टीकोनातुन पुरावे गोळा करण्यास सुरूवात केली. तसेच गुन्हयाचे अनुशंगाने गोपनीय माहिती मिळवण्यास सुरूवात केली. त्यांच्या प्रयत्नांना यश आले आणि तांत्रिक माहितीच्या आधारे एक महिला संशयितरीत्या घटनास्थळाचे आजूबाजूला फिरत असल्याचे दिसून आले. सदरील महीला कोण आहे याबाबत अधिक माहिती घेतली असता सदर महिला याच परीसरात राहणारी वनिता झुंबर सुरवसे ही असल्याचे समजले. त्यावरून नमुद महिलेच्या मुलाकडे तिच्याबाबत चौकशी केली असता ती उपचारकामी ससुन रूग्णालय, पुणे येथे गेली असल्याचे त्याने सांगितले. त्यारून एक पथक नमुद महिलेचा शोध घेणेकामी पुणे येथे पाठविण्यात आले त्यादरम्यान ती भिगवण येथे राहत असलेल्या तिच्या मुलीकडे असल्याबाबत माहिती मिळाली. त्या ठिकाणावरून तिस ताब्यात घेण्यात आले. तिच्याकडे नमुद गुन्हयाचे अनुशंगाने चौकशी केली असता तीने उडवाउडवीची उत्तरे दिली. तिस विश्वाासात घेवून विचारले असता तिनेच सदरील गुन्हा केला असल्याची कबुली दिली. सदर महिलेस खुन करण्यामागचा उददेश विचारला असता तिने सांगितले की, मयत महिलेकडून आरोपी महिलेने दागिने गहाण ठेवून ४०,००० रू उसणे घेतले होते आणि त्या मुददयावरून मयत महिला हि आरोपीस सतत त्रास देत होती. त्या गोष्टीचा राग मनात धरून आरोपी महिलेने सुभद्रा पाटील हिचा २१.११.२०२५ रोजीच्या मध्यरात्री खुन केला आणि तिच्या अंगावरील दागिने काढून पुणे येथे पळून गेली होती. सदरील आरोपी महिला नामे वनिता झुंबर सुरवसे, रा जळकोट ता तुळजापूर जि धाराशिव हिस पुढील तपासकामी पोलीस ठाणे नळदुर्ग यांचे ताब्यात देण्यात आले आहे.
सदरची कामगिरी मा. श्रीमती रितू खोखर, पोलीस अधिक्षक धाराशिव यांचे मार्गदर्शनाखाली स्थानिक गुन्हे शाखेचे पोनि श्री विनोद इज्जपवार, सपोनि सुदर्शन कासार, पोह शौकत पठाण, पोह जावेद काझी, पोह फरहान पठाण, पोह प्रकाश औताडे, चापोह सुभाष चौरे, रत्नदिप डोंगरे, नागनाथ गुरव यांचे पथकाने केली आहे.
